Descrizion dla jita
A ce fusties ti jons’a do ntan chësta jita?
Gherdëina à na storia agrera de cënc y cënc d’ani. Coche l’agricultura à mudelà la cuntreda, la cultura y l’architetura y coche la les caraterisea mo ncuei possen usservé scialdi bën ntan la jita di mejes sa Sacun. Nosta escurscion nes mëina ala ravises de chësc ambient de vita y la nes dà nce n’idea de ce ndesfidedes che la/i paures dla valeda messova afrunté zacan di per di.
Cie nes aspieta pa?
La jita di mejes ne prejënta deguna deficulteies particuleres y ie perchël adateda per duta la familia. De ndut van a pe per 2,8 km fajan n deslivel de plu o manco 350 metri. La jita dura de ndut n 2 ëura, sce n fej la vijita meneda pra i mejes stan ora n 3 ëura.
Ulà nes mëina pa la jita?
Pra la dlieja de Urtijëi tulons l Citybus che va sa Sacun. Canche furnon su pudons udëi i mejes Col de Flam Dessot y Col de Flam Dessëura, che ie adès n 500 ani vedli. Zapon ora dla curiera sa Sacun pra la fermeda Banch y jon su per streda dal luech da paur tert-gotich Trëbe y da iló nchin dal luech dl Mëune, che va de reviers al 1453.
A man ciancia mëina su n troi marcà tres i prei sala dlieja da Sacun, che ie la dlieja plu vedla dla valeda. Da iló jons per n troi de viers de Santa Cristina per ruvé tres l bosch dal luech da Peza, che ie un di luesc da paur plu vedli dl’Elpes che se à mo mantenì tla forma uriginela.
Nosta jita fina pra la fermeda dla curiera Somont pra la ustaria dal medemo inuem.