Tres l Geoportal iel mesun scuvierjer a na maniera interativa l’arpejon culturela dla region, l cunlieia, defati, la storia dla region cun si cuntreda unica y crieia n puent danter passà y presënt. Da scuvierjer iel lueges te Gherdëina y ntëurvia ulache l ie unì a se l dé o abinà ogec storicamënter nteressanc. Nsci vëniel cunlià reperc archeologics y paleontologics cun si lueges d’abineda, minerei tipics de nosc luesc cun la particulariteies geologiches dla Mont de Sëuc y opres d’ert cun si zëntri de produzion o l’architetura che fova n iede ntëur chisc zëntri. I ogec ie bëns culturei ora dla culezions dl Museum Gherdëina y ogec reprejentatifs dla cultura architetonica te Gherdëina.
Che n sibe dl luech, ghesć, studënc o studëntes o tuadëures – l Geoportal mostra Gherdëina da na pruspetiva nueva. l uega dassënn ala persones nteressedes ala cultura, a chëles che fej gën escurscions ma nce ai operadëures turistics. Per adressé duc – nce sëura i rëms linguistcs ora – vën i cuntenuc pitei te de plu rujenedes uel dì per ladin, talian, tudësch y nglëisc.
Nsci vala
Cherta
Tres la cherta interativa posses scuvierjer duta la lueges ulache i ogec ie unic a se l dé o abinei.
Zoomete ite y giatete ora nfurmazions nteressantes sun i ogec – tesć descrijënc curc, imajes, video o links che mëina inant, dantaldut tl “portal web di ogec ti museums, tla culezions y ti archifs tl Südtirol“. Filtri possa te judé a crì la cosses y limité i truep ogec dajan ite la categuries, i tëmps y i raions.
Jites
Tlo abines jites nteressantes y prupostes tematiches. Les te nvieia a scuvierjer la natura, la cuntreda, la cultura y la storia. La nfurmazions ala menuda cun la descrizion dla raida o dl troi y di tëmps te juda a abiné y urganisé na jita adateda. Jì a pe – nianca da pensé!? Po scuvierj la raida bel scëmpl interativamënter.
Juesc
Fé damat ie deletëul! Te “Cëla avisa” posses tres pitli detai crì i ogec cunliei o te dé ju cun i fossii y minerei de Gherdëina te n juech Memory.
Sce l Geoportal à descedà ti nteres posses amiré duc i ogec prejentei n ucajion de na vijita tl Museum Gherdëina y unì a mparé a cunëscer de plu sun la geologia dla Dolomites y la storia culturela de Gherdëina.
Comuniché la scuvierta de ogec
Sce te es abinà ntan na ti escurscion n repert o na luegia d’abineda po fénes riesc al savëi. Te posses nes l fé al savëi nce diretamënter tl Museum Gherdëina, che se cruzia pona de duta la furmaliteies. Sce n oget abinà ëssa da unì metù ora n mostra tl Museum vëniel nce nunzià si scuvridëur/a.
Bon da savëi: giavamënc archeologics y meneralogics ie pruibii sce n ne à deguna autorisazion curespundënta y uni oget archeologich y paleontologich abinà – nce ogec abinei per cajo – muessa unì detlarei debota al’autoriteies cumpetëntes a chëles che i ogec muessa ënghe unì dac ju.
Nfurmeiete sun la situazion leghela tla Talia y dantaldut tl Südtirol.
Nsci al scumencià
L proiet ie unì metù a jì dal Museum Gherdëina y realisà tl cheder dl program de sustëni dla UE NextGenerationEU per la trasfurmazion digitela tl ciamp criatif dla cultura cun n cuntribut dl Ministere per la Cultura dla Talia (Mission 1 – Investimënt 3.3.2 dl PNRR).
Traverc
Cun l Geoportal mira l Museum Gherdëina al travert de crië n dialogh danter la cultura y la cuntreda dl raion de Gherdëina. A chësta maniera uelel sustenì la cunescënza y la cunsapuda n cont di bëns culturei dla region y purté pro a chësta maniera al svilup de n turism culturel cuscient y sustenibl. Tres l cunliamënt de cultura, istruzion y tecnologia digitela ie la populazion dl luech y i ghesć nviei a scuvierjer l raion da na pruspetiva nueva y plu ampla.
Per pudëi arjonjer n publich pusciblmënter lerch an cialà de fé che la strutura dla cherta digitela sibe intuitiva y l lingaz scëmpl. Y acioche l Geoportal sibe azessibl nce per persones vierces y cun mpedimënc de vista an oradechël tëut na lingia de mesures:
• adatamënt dl layout tres l’azion ativa di/dla nuzadëures (p.ej. spersa d’ativazion)
• reprejentazion di ogec sun la prima plata coche lista mpede coche cherta
• reprejentazion dla jites defrëntes coche lista da navighé
• tesć auternatifs per duta la imajes
Mbincion legrëza a viagë tres l portal y a scuvierjer cosses nueves!
L team dl proiet