L ciastel de Val di seniëures de Wolkenstein, che ie ncuei n sedim, fova n ciastel sota l crëp de Stevia ala ntreda de Val (perchël ciastel de Val). Tlo fovel n iede nia dalonc l un dal auter doi ciastiei per la fortificazion dl Troi Paian. L ciastel che n vëij mo ncuei ie unì frabicà ntëur l 1200 y ie plu tert po unì sëurantëut da Meinhard II, che l à auzà a sënta de sunieria doteda de bëns. Do l 1370 ie l ciastel deventà sënta dla familia de Wolkenstein.

La dlieja da Sacun ie la dlieja plu vedla dla valeda y dëssa vester unida frabicheda dai seniëures de Stetteneck ntëur l 1200. Documenteda per l prim iede iela tl ann 1246. L fat che la ie unida cunsacreda a San Iacun, l prutetëur di viandanc, ie bonamënter gaujà da si pusizion pra l Troi Paian. La dlieja ie decureda cun opres d'ert zipledes tl tëmp baroch. La scultures urigineles vën cunservedes tl Museum Gherdëina.